
Am 7. Septämber startet e ufgschteuti u guet gluuneti Gsellschaft mitem Bus uf Adubodä ids beschtens bekannte Hotel Hari. Uf üs wartet, bi no beschtem Wätter, äs feins Zmittag. Guet gnährt chöi mir aschliessend üsi Zimmer bezieh.
Am erschte Nami mache aui grad echli wie si möchte u am Abe si aui ziemlech müed u mir höckle i üsem Ruum no echli zäme für de gli ids Bett ds gah.
Am Sunntigmorge wartet äs feins u riichhautigs Zmorge Buffet uf üs. Jede Morge chöme aui ds friede u ufgschteut mit eme fröhleche Gsicht derhär, je nach däm chli früecher oder ä chli speter.
Am Nüni fingt üsi täglechi Morgefitness statt unger dr Leitig vom Vreni. Jedes macht mit wie nes cha u mah. Jede Tag isch angersch u Usflüüg si nid so aagseit die Wuche wie angeri Jahr. Dr Wätterbricht hautet leider was är verspricht: Äs rägnet vieu u am Donnschtig schneits obeiche u am Frytig sogar bis zu üs ache – grad wie im töifschte Winter!
Das Wätter laht üs aber vieu Zyt zum jasse, spile, lisme u natürlech gits vieu ds rede u ds verzeue. So hei mir üs entschiede, üses gliebte Lotto scho am Donnschtig Nami ds mache. Aber zrugg uf die Abeungerhautige: D’Marianne u d’Kathrin läse interessanti Gschichte vor u fordere üses Hirni mit usefinge wie äch das Sprichwort richtig heisst. Dr Willi laht üs i schöne Erinnerige schwelge vo Zoubrügg, dahlia u ds Käthi uf dr Aup. Dr Ralf het ganz e bsungeregi Useforderig parat, nachdäm är ir ganze Gmeind spezieui Ufnahme het gmacht. Itz si üser Seniore dranne: „Wo zum Gugger isch äch die Foto gmacht worde?“ Äs bruucht mängisch echli lenger bis äs öpper usefingt. D’Renate belohnt mit feine Schnousisache die Person wos het errate. Mir aui hei vieu Spass derbi. Ja u langsam geit o aues schöne ds änd u äs heisst wieder Abschied näh. Abschied müesse mir o näh vo däm aute Houpthuus vom Hari wo mir so mängisch fein gässe hei. Mir si nämlech die letschte Gescht gsi dert inne. Nach üsere Abreis wird das Huus usgruumt u nähr wird aues am Ärdbode gliichgmacht. Derfür entsteiht de äs nöis, id Gägend passends Huus. Itz lah ig aui lieb lah grüesse u danke für die schöne Täg mit öich. I fröie mi scho itz uf die nächschte Ferie mit öich aune. Bis gli, sunnegi Grüess vor Eliane
PS: … vergässet nid – we dir öppis suechet, lueget im Graniumchischtli nache…!