D’Vorbereitige für e Basar 2024 föh scho im Januar a.
Da wird gluegt was Trend isch: ärmellosi Oberteili i verschiedene Farbe, Chindersocke mit Müsli-Gsichter, Mittli i verschiedene Lengine, Farbe u meh oder weniger komplizierti Muschter.
Ds Emmi tuet filze, fasch jedes Tierli wo der Liebgott erschaffe het.
Glücks-Käferli, Seehüngli, Eseli, Müsli i verschiedene Farbe.
D Sarah kreiert Chartene, der Kurt freset die passende Holzlischtli use u d Martha steckt d Trocheblueme i die vorbohrete Löcher.
Früech Tagwach gits o bi Schifferlis im Gässli u bi Zaugg’s ds Schwanden.
Da wird gschlüüferlet, Berliner frittiert, züpflet u Brot bache.
E ungloublechi Vielfalt a säubergmachte Sache chunt da zäme u präsentiert sich i der heimelig igrichtete Pfrundschür.
D Lüt chöme zahlrich. Die wone schöne Chranz wei müesse früech cho.
D Tüüre vo der Pfrundschür göh uf am nüni u es ‘räblet’ ;-), der ober Stock füut sich u es wird ikouft, gänggelet u hie u da fingt me scho die einti oder angeri Gschänk-Idee uf d Wiehnachte.
I der Kafistube trifft me Lüt wo me scho lang nümm het gseh.
Speter am Vormittag schmöckts nach Chürbissuppe u Nöimühliwürscht.
Wär no Platz het im Buuch däm macht d Erika gärn grad e früschi Waffle.
‘Was darf i Dir druftue?
Ahornsirup, Zimetzucker, Puderzucker?»
E rundum glungene Alass im schöne Dorf Rüderswiu geit wieder z Änd.
Itz geits ads Ufruume, Zäut abprotze, Bänk u Tische müesse verrumt wärde.
Da si Hertigs wieder zur Steu u d Froue näh der Stoubsuger id Hang.
Der nächscht Alass i der Pfrundschür steit scho wieder a, vorhär muess d Pfrundschür no gründlech putzt wärde.
Ganz härzleche Dank aune wo zu däm gsellige, schöne Alass derzue bitreit hei.
Im Name vo der Kirchgmeind Rüderswil
Barbara Zuber
