Wüu me färn die Goudigi Konfirmation wäg Corona nid het dörfe fiire, si hüür rund 60 Iladige für 2 Jahrgäng verschickt worde.
So hei sich Afang März auso 24 ehemaligi Konfirmandinne u Konfirmande us drüne verschiedene Schueuhüser, wo i die Jahr 1970 und 1971 z Rüderswiu i der Chiuche si konfirmiert worde, zu der Fiir agmäudet.
A däm no chli chüehle aber strahlend schöne Palmsundig- Morge hei sich die zum Teil witt greiste Froue u Manne i der schön gschmückte Chiuche troffe.
Der Gottesdienscht isch gstautet worde vo der Pfarrerin Renate Beyeler. Sie het die ehemalige Konfirmandinne u Konfirmande jahrgangswiis la ids Chiuchechor fürecho.
Mit em ne Sägensspruch und em ne Spitzbueb het d Pfarrerin sie härzlech begrüesst/ geehrt.
Wüu me i der Chiuche immer no nid darf singe, het d Pfarrerin der Text vom Lied „ Sollt ich meinem Gott nicht singen“ strophewiis vorgläse. D Mirjam Siegenthaler hets vorgängig uf der Orgele vorgspiut.
Nach der Predigt wo ganz im Zeiche vom Palmsundig isch gstange, het d Renate Beyeler es Gedicht mit em Text „Vertraut den neuen Wegen, auf die der Herr uns weist…“ vorgläse. Dä Liedtext söu Muet mache, i jeder Läbeslag uf Gottes Hiuf z vertroue. Dä Gott wo üs ds Läbe ighucht het, wird üs dert häre füehre wo är üs brucht.
Im Aschluss a Gottesdienscht het der Benjamin Stocker Fotone vo jeder Konfklass gmacht. Dert vor der Pfrundschüür het när o es Apéro, säubverständlech corona-konform 😉 stattgfunge. Bim Astosse isch du no dieses u äis Gschichtli vo früecher zum Vorschin cho.
Es grosses `Merci` aune Beteiligte wo zu däm fiirleche Alass hei biitreit.
Im Name vom Kirchgmeindrat
Barbara Zuber
Photos von der goldenen Konfirmation
1970 
1971